Rannsóknaþjónusta Háskóla Íslands

Þjónusta við þekkingarsamfélagið

Rannsóknaþjónusta Háskólans leggur áherslu á þjónustu sem lýtur að öflun styrkja úr samkeppnissjóðum, samstarf háskólafólks við aðila utan stofnunarinnar og hagnýtingu á þeirri þekkingu, reynslu og rannsóknaniðurstöðum sem er til staðar innan háskólasamfélagsins.

Sérstaklega býðst starfsfólki eftirfarandi:

• Upplýsingar um alþjóðlega sjóði sem styrkja rannsóknir og tækniyfirfærslu sem Íslendingar eiga aðgang að, bæði evrópska og norræna.
• Upplýsingar um íslenska sjóði og áhættufjárfesta fyrir rannsóknir og atvinnulífið
• Upplýsingar um niðurstöður samstarfsverkefna ESB og hugmyndir um nýtingu þeirra í þágu íslensks atvinnulífs.
• Aðstoð við gerð umsókna til rammaáætlunar ESB um rannsóknir og tækniþróun og menntaáætlunar ESB. Aðstoðin getur einnig tekið til stjórnunar rannsókna- og tilraunaverkefna, samskipti við framkvæmdastjórn ESB, skýrslugerð og innbyrðis samskipti þátttakenda
• Aðstoð við yfirfærslu tækniþekkingar og nýsköpun. Aðstoðin felst í leit að samstarfsaðilum, ráðgjöfum, sérfræðingum og öðrum aðilum sem nýst geta fyrirtækjum við nýsköpun og ráðgjöf varðandi einkaleyfi
• Aðstaða fyrir nýsköpunarfyrirtæki í Tæknigarði og leiðbeiningar fyrir þá sem vilja setja á stofn fyrirtæki

Umfang þjónustu við starfsmenn Háskóla Íslands

Rannsóknarþjónustan veitir öllum starfsmönnum Háskólans ráðgjöf og aðstoð innan þeirra marka sem fjárveiting skólans til stofnunarinnar leyfir. Almennt er miðað við ráðgjöf í 4 til 20 klst. eftir umfangi verkefna. Sé þörf á umfangsmeiri aðstoð þarf að semja um það sérstaklega.

Nemendur fá sömu þjónustu og starfsmenn

Nemendur Háskóla Íslands eru einnig starfsmenn hans í þeim skilningi að þeim stendur til boða sama þjónusta og starfsmönnum varðandi sókn í samkeppnissjóði um rannsóknastyrki og stofnun sprotafyrirtækja. Í nær öllum tilvikum þegar stofnuð hafa verið sprotafyrirtæki á grundvelli rannsókna við Háskóla Íslands og stofnanir hans hafa nemendur komið þar við sögu. Til viðbótar þessu leggur Rannsóknaþjónustan sitt af mörkum með tvennum hætti:

Aukning í fjölda meistara- og doktorsnema leiðir eðlilega til aukinnar eftirspurnar eftir styrkjum, bæði almennum framhaldsnámsstyrkjum og rannsóknastyrkjum sem sérstaklega eru ætlaðir framhaldsnemum. Á vef  um samkeppnissjóði eru upplýsingar fyrir meistara- og doktorsnema með yfirliti yfir helstu sjóði og styrkjamöguleika.

Landsskrifstofa Menntaáætlunar ESB veitir styrki til háskólanema og þeirra sem eru nýútskrifaðir til að fara í starfsþjálfun sem er annað hvort hluti af námi eða kemur í beinu framhaldi af því og nýtist til að byggja upp starfshæfni viðkomandi.